Jay

Jaco du Plessis, oftewel Jay soos hy meer algemeen bekend staan, is ’n baie gewilde Afrikaanse sanger. Popmusiek gaan oor melodieuse storievertelling - iets waarmee Jay betower en beïndruk.

Hy is al vir vyf jaar in die solo-veld en sy tweede solo-album, #DisHoeOnsRol, het stilweg en selfversekerd kort ná uitreiking platinumstatus behaal vir verkope van meer as 40 000 eenhede. Jay se derde solo-album - So Lank Sal Ek Jou Liefhê - is ook nou beskikbaar by musiekwinkels.

Jennifer Zamudio

Jennifer sing reeds die afgelope 18 jaar professioneel. Sy het haar sangloopbaan by Anneli van Rooyen se sangskool, Promuzik in Pretoria, begin. Sy is in 2000 tydens die KKNK op Oudtshoorn deur die musiekpromotor Lydia Winchester raakgesien en dit het gelei tot haar eerste platekontrak.

Haar musiek is lewendig en energiek, maar sy sing ook ballades. Sy skryf van haar eie liedjies en speel ook kitaar. Sy het reeds 11 solo-albums agter haar naam: Leef, Jy is die een, Ek het jou gevind, Hart se loper, Hoor hoor, Hier’s my hart, ’n Dekade van musiek, Die lewe is ’n liedjie, Hart en siel, 15 Jaar spesiale uitgawe en Ongelooflik. Sy is ook al ingesluit op 16 verskillende kompilasie-albums.

Amoré Rudman

Amoré is op 3 September 1987 in die Wes-Kaap gebore. Sy het reeds op hoërskool vir die bekende platemaatskappy Select Musiek opnames gedoen vir verskeie kompilasie-CD's. Amoré is geen vreemdeling vir rondreis en optree nie.

Sy doen gereeld verskillende optredes wat wissel van feeste, troues, danse, oggendfunksies en modeparades, van die Kaap tot Limpopo. Sy het al drie albums uitgebring - Vervaardig in Suid-Afrika, Kamermuur en Desember-liefde. Sy het ook al op televisie verskyn in programme soos Jukebox, Fiesta en Jou Show met Emo.

Pieter Koen

Sedert 1997 is die vermaaklikheidswêreld al die speelveld van die nimlike Pieter Koen, maar dit was sy EMI Music-trefferalbum, Skud Jou Biscuit, wat van hom volksbesit gemaak het.

Jare later spoor hierdie status, sowel as sy katalogus van verskeie albums, hom steeds aan. Koen het verskeie SAMA-nominasies en ’n Vonk/Rapport-toekenning op sy kerfstok.

Luhann Groenewald

Luhann Groenewald het reeds in 2002 begin sing en het dit sy doelwit gemaak om soveel mense moontlik deur sy musiek aan te raak en te inspireer.

Desmond Wells

Desmond Wells het in 2005 sy loopbaan as polisieman in die SAPD opgegee om voltyds sanger en liedjieskrywer in die Afrikaanse musiekbedryf te word. Sy debuutalbum Heeltyd Speeltyd is in 2006 genomineer vir ’n SAMA-toekenning vir die beste Afrikaanse dansalbum van die jaar. Desmond se album Desiré is genomineer vir ’n Huisgenoot Tempo-toekenning vir Beste Afrikaanse Album van die Jaar en hy is ook in dieselfde jaar as die gewildste manlike kunstenaar bekroon tydens die jaarlikse Bok Radio-toekennings.

Desmond se album Staan vir altyd by My is in Junie 2017 vrygestel met liedjies soos Dansvloer Liefde en Die woorde in My wat groot treffers op radiostasies dwarsoor die land was. Die album is by die jaarlikse Bok Radio-toekennings in 2017 aangewys as die gewildste Afrikaanse album van die jaar.

Christo & Cobus

Christo en Cobus is ’n musiekgroep wat uit die broers Christo en Cobus Snyman bestaan. Hulle tree ook saam met hul jongste broer, Nic Stevens, onder die verhoognaam Broers op.

Die duo spog met treffers soos 7x70, Trein Na Margate, Nuwe Winde en Tiekiedraai deur die eeu. Hulle gaan feesgangers behoorlik by vanjaar se fees laat skoffel en saamsing.

Klipwerf

Die Klipwerf Orkes vier vanjaar hul 50ste bestaansjaar. Hierdie gewilde orkes gaan steeds van krag tot krag, met oud en jonk wat met hul konserte in die gehoor sit en behoorlik hul litte los dans op tradisionele boeremusiek.

Die orkes, wat bekend is met treffers soos Warmvat-vastrap en Boesmanland, spog met verskeie SAMA- en Tempo-musiekpryse. In 2018 is die orkes ook met ’n Ghoema-prys vereer. Die FAK het in Februarie vanjaar ’n trofee en sertifikaat aan die orkes oorhandig as erkenning vir hul bydrae tot boeremusiek die afgelope 50 jaar.